![](https://blogger.googleusercontent.com/img/b/R29vZ2xl/AVvXsEgZAPBJwn3EfoF8Lh7ZhlvgnFVFauq2L-BEDiwhC0u7SGWOnJ7P5BGccVbZBja3dnSguuDomedhBRusXBajHJo4uUR7Zt95s_0a5CnqosHNCfBht5nBBOPZy_SD8_JTxpkF-WyFwlwx0s6w/s320/77-1.jpg)
![](https://blogger.googleusercontent.com/img/b/R29vZ2xl/AVvXsEhc2Exf3nvjQmIOfaSdWkC7rmfYu1tBv1mrFlEgmw0ELQhoyLKCiW-KwOoOB18qBtJfL2OovVOHYiU3k7mNIIUkEWuja52ffz1FTtcvrLrCpAsJ-gqxxxaJIuDktLlLrt_vjlgPhmc9tbnN/s320/77-1b.jpg)
![](https://blogger.googleusercontent.com/img/b/R29vZ2xl/AVvXsEiO777wvJd90OSUGAht2NcEZOU1SPJarTrGp04P3Pam4EnERumSZfVEBQJdxYFQKSmlIiQrVw6bMRHldZImZARLLSuGtHsayNWF-IBGJ0uqC13dVeRyEbOt6K8Za8zLzSaDKg9wTG-ucThr/s320/77-2b.jpg)
![](https://blogger.googleusercontent.com/img/b/R29vZ2xl/AVvXsEiZXaIwayF1E4INgctrYxavsgbGUpOEwzNybRcyXg7Fu4QSzlvdYt3YeJEpSQ0WKUUJXHF51QNG5aFQRgsa6IpV-OvkkZ_d2KAmgTKERsJOXenkkk2D_jCf8jbvvceIB9lvL29nXO8q5gqC/s320/77-3b.jpg)
![](https://blogger.googleusercontent.com/img/b/R29vZ2xl/AVvXsEgiMMZUOxq43PBxentzkaGQWK4_tvK7TJMsTq4jYEqBJ92A0NjEPGoT6NXwFoiI-t8PWd6DYWHtACXcfT4DAS0nFD8qLuGncdOo0CeSqJvE2v3kAAwp69GfrTJbFlpi_8XXrW8STqNS5h-g/s320/77-4b.jpg)
![](https://blogger.googleusercontent.com/img/b/R29vZ2xl/AVvXsEhASst46D1BNzKuuDujZHKxXlmm2ipn3oTHhvj6zjm2JL6lnRE4z5w9RD7Q3HiDpqCqcQMAKubWV5rTPLICv5gwN17xKPVXHyxKrxHDe_LFzPIX1YdUf_W6FSp_VRUXeELcL7RNtgcw1UYg/s320/77-5b.jpg)
![](https://blogger.googleusercontent.com/img/b/R29vZ2xl/AVvXsEju5_xUP56pCdVkOKG1eidjhu-Rp3tNi0XUi_BcqU_8js3KijJ1wizKgqoLf63lPQVnhyphenhyphenyCuy5gBCk6-G8PpkMbSXspL2hfMw7EsPJviQAhxXRKMTaPx92tyrRNw3GqNk13wwn4BquIPQll/s320/77-6b.jpg)
På Vestadstranda har ein stolpe stått på skrå. Den var knekt på bakkenivå. I dag kom ein mann og ein bil, og etter ei arbeidsøkt var ny stolpe på plass. Her ser vi Stig Dyrhaug oppe i stolpen. Resten av bilda får du ved å klikke deg inn og sjå på dagens vesle kvardagsreportasje frå Sekken.
Ein telefonstolpe kan innehalde mykje informasjon. På ein spikar står det L63. Det skal bety at stolpen er laga i 1963. Det står nummer på stolpen, og nummereringa begynner nok på 1 ved sentralen på Eik. Eit tal fortel at denne stolpen er 8 meter lang.
Ei kvit remse viser at akkurat denne stolpen blei kontrollert i 1997 og skulle bli kontrollert igjen i 2007. Det siste blir no ikkje aktuelt, og det første er litt rart: Røteskadene burde nok ha blitt oppdaga i 1997. Men denne stolpen greidde vel å lure seg gjennom kontrollen.
Stig Dyrhaug fortel at han har skifta hundre år gamle stolpar, som har vist seg å vere heilt fine. I Vistdal var borti ein frå 1916, og i Tjellekleiva var det nok endå eldre eksemplar i god stand.
Før kom det ein blå bil frå Telenor til slike oppdrag. I dag ringer Bravida til Stig Dyrhaug eller andre entreprenørar når ein knekt stolpe skal erstattast av ein ny.
Jostein Eik og Erik Eik begynte i Televerket i oktober 1965. Jostein fortel at dei då kom heim frå militærteneste, og var hyra inn av Sivert Malones til arbeidslaget hans som då var i gang med å sette opp nye telefonlinjer på Sekken. Dette var eit ledd i automatiseringa av telefonen i bygda. Telefonsentralen på Vestad ble då lagt ned. Ein automatsentral kom seinare opp på Eik. Jostein fortel at arbeidet med linjene ikkje var i gang då han og Erik reiste til Steinkjersannan i oktober 1964. Dermed kan det godt stemme at den aktuelle stolpen blei produsert i 1963, og sett ned på Vestadstranda i 1964 eller 1965.
Førti år har den gjort sitt, og mange telefonsamtalar har passert.
Øystein Eik (tekst og foto)
ID: 77
0 kommentarer:
Legg inn en kommentar
Merk: Bare medlemmer av denne bloggen kan legge inn en kommentar.